穿越張三豐（下）
上集：https://bit.ly/37At0qA
但準備婚禮期間，我開始感受到一種壓力。
因為我內力深厚，聽力都超乎常人，我聽到啲弟子竊竊私語，話我臨老入花叢，話我百年童子功毀於一旦，好快會武功盡失……
簡直荒謬，我雖然係童子身，但我嘅武功係來自多年修練，而唔係來自童子功，唔通真係廿五歲就會自動變魔法師咩？
為免人心惶惶，我不得不公開闢謠，話畀大家知，我嘅武功唔會出問題。
但係，議論冇被平息，有人打聽到，阿草係喺深山出嚟，就話實係我欺騙無知少女，唔知醜；
又有人話阿草係深山妖精，嚟吸晒我啲陽氣。
我開始覺得，徒子徒孫望向我嘅目光，都帶住嘲諷同鄙視。
「太師父千年道行一朝喪啊。」
「仲以為佢清心寡欲添，原來呃人嘅。」
我同阿草講：「大家都唔贊成我哋結婚，佢哋喺背後笑我哋。」
「咁又點？」阿草一臉迷惑。
我都唔知點同佢解釋，佢喺深山出嚟，當然唔識在乎人哋嘅評論。
但我唔係野人，我係武當派掌門，有身份有名望有地位。
我離開武當山，去附近嘅城鎮，果然大家都喺度講緊我結婚嘅事，基本上都係笑我。
我雖然有絕世武功，但我掩唔住天下人悠悠眾口。
婚禮尚未舉辦，全世界都已經開始嘲笑我，一旦阿草成為掌門夫人……我嘅下半生，就要不斷被鄙視。
我取消婚禮，阿草好失望咁走咗。
阿草離開後，我嘅生活冇晒色彩，我慢慢好似真正嘅張三豐一樣，過住清心寡欲嘅生活。
唯一值得慶幸嘅係，冇人再話我唔好，睇嚟大家都好滿意我取消婚禮。
轉眼間過咗十年，我依然好掛住阿草，但我知道，我唔可以搵佢。
有一次，道童幫我執嘢嗰陣，我忍唔住問：「你哋係咪覺得，我唔成親真係一件好事？」
「成親？太師父要成親咩？」道童好迷茫。
係喎，呢個道童前兩年先入武當，佢可能唔知呢件事。
不過，其他弟子講八卦嗰陣，冇同佢講過咩？
我就去問另一個徒孫，十年前，佢講反對我成親嘅說話，係講得最多同最勁。
「太師父之前要成親？有啲咁嘅事？」
徒孫有啲迷茫，回憶咗一陣先講：「哦，我記得啦，係阿草姑娘！」
我有啲無奈，當年佢講到我成親好似十惡不赦咁，依加居然冇乜印象？
我提醒佢：「你當年好反對我成親㗎喎。」
徒孫笑得尷尬：「係咩？哈哈。」
「你就冇嘢想同我講？」我言下之意，係想聽到佢嘅道歉，或者講吓對呢件事嘅睇法。
點知徒孫馬上拎出一本門派武功秘笈：「當然有啦，我練太極拳嘅時候，有啲地方唔係好明，如果太師父肯親自指點我……」
我無言以對。
我問咗好多個當年講我壞話嘅人，但大家對呢件事都已經印象模糊，
甚至有人忘記咗當年嘅立場，居然同我講：「成親咪幾好囉。」
嗰一刻，我恍然大悟。
我決定去搵阿草，無論要花幾耐時間，行幾遠嘅路，我都要話搵到佢，向佢懺悔我當年有幾傻。
其實根本冇咁多人在意你嘅喜同悲、你係拍拖定分手、你同邊個結婚、故事有咩下文……
或者大家會八卦幾句，討論時咬牙切齒，好似講緊世上最重要嘅事，但八卦之後，就轉眼淡忘，毫不上心；
只有被討論嘅主角，留喺原地，耿耿於懷。
人生最容易產生嘅錯覺，莫過於「所有人對笑緊我」。
－完－
我殺咗隻機械人女友：https://goo.gl/PUEh7J
我嘅職業係：雷公：https://goo.gl/N5BZuR
#短故 #短篇 #小說 #陳美濤 #廣東話 #粵語 #tomatochan #穿越張三豐
Search